v1adis1av (v1adis1av) wrote,
v1adis1av
v1adis1av

Древнеруский путеводитель по Флоренции и Венеции (1438 год)

Той же славный град Флоренза велик зѣло, и такова не обрѣтохом въ предписаных градѣх: божници в нем красны зѣло и велици, и полаты в нем устроены бѣлым каменем, велми высокы и хитры. И посреди града того течет рѣка велика и быстра велми, именем Рна; и устроен на рѣцѣ той мостъ каменъ, широк велми, и съ обѣ страны моста устроены полаты... В том же градѣ дѣлают камки и аксамиты съ златом. Товара же всякого множество и садов масличных, и тѣх маслиц древяное масло... И ту же сукна скорлатные дѣлают. Ту же видѣхом древие кѣдры и кипарисы; кѣдръ как руская сосна, много походило, и кипарис корою яко липа, а хвоею яко ель, но мала хвоя кудрява, мяхка, а шишки походили на сосновую. И есть во градѣ том божница устроена велика, камень моръморъ бѣлъ, да чернъ; и у божницы тое устроен столпъ и колоколница, тако же бѣлы камень моръморъ, а хитрости ея недоумѣетъ умъ наш; и ходихом в столпъ той по лѣствицѣ и сочтохом степеней 400 и 50. В томь же градѣ видѣхом лютых зверей 22. А около града того стѣна 6 миль...

От Кѣзы до града Венеции 25 миль, а шли морем. А той град стоит на мори, а суха пути к нему нѣтъ, а от берега 13 миль стоит в морѣ. Среди его проходят корабли и катарги, а по всѣм улицам воды, ездят в барках. Но велми град той великъ, и полаты в нем чюдны, а иные позлачены. И товару в нем всякого полно, занеже корабли приходят изо всѣх земель, от Иерусалима и от Царяграда, и от Азова, и ис Турьские земли, и ис Срачинъ, и из Нѣмець. Есть в градѣ том цръковь камена святый Марко Еуангелистъ, и столпы в ней морованы, имущи мрамор всякъ цвѣтом; а иконы в ней чюдны, гречин писал мусиею, и до верху видѣти велми чюдно; а внутри рѣзаны святые на мраморѣ велми хитро; а сама велика церковь. А надъ предними дверми изнутри поставлены 4 кони медяны, позлащены, велики, видѣти яко живи, и повѣшены два змия великы убиты. Ту и сам святый Марко лежит; а мощей святыхъ много, иманы изъ Царяграда. И монастырей много около града того по островом на морѣ близь, и иных церквей въ градѣ том.

http://lib.pushkinskijdom.ru/Default.aspx?tabid=4996
Subscribe

  • Post a new comment

    Error

    Anonymous comments are disabled in this journal

    default userpic

    Your reply will be screened

    Your IP address will be recorded 

  • 2 comments